२० असोज, काठमाडौं । नेपाल एसबिआई बैंक लिमिटेडले व्यक्तिगत निक्षेप र रिटेल कर्जालाई विस्तार गर्ने रणनीति सार्वजनिक गरेको छ । गत आर्थिक वर्ष २०६९/७० को वित्तीय अवस्थाबारे जानकारी गराउन साधारणसभाको पूर्वसन्ध्यामा आयोजित पत्रकार सम्मेलनमा बैंकले उक्त जानकारी दिएको हो ।

‘निश्चित उद्योग क्षेत्रमा विषेश ध्यान दिँदै रिटेल कर्जामा उच्च ध्यान केन्दि्रत गर्नेछौं’, बैंकले भनेको छ, ‘उच्च लागतका निक्षेपलाई व्यक्तिगत तथा रिटेल निक्षेपले प्रतिस्थापन गरिदैं जाने बैंकको रणनीति हुनेछ ।’ बैंकले यही असोज २३ गते साधारणसभा गर्ने जनाएको छ ।

बैंकमा व्यक्तिगत निक्षेपकर्ताको संख्या गत आवमा उल्लेख्य बढेको छ । बचत खाताको संख्यामा २०.२० प्रतिशत को वृद्धि हासिल गर्दै ७ हजार ३ सय ३८ नयाँ खाता खोल्न सफल भएको बैंकले जनाएको छ । त्यस्तै, मुद्दती निक्षेपमा उच्च लागतको निक्षेपको अनुपात २२.६६ बाट ३.७ प्रतिशतमा झरेको बैंकले जनाएको छ ।

बैंकले गत आवमा ७७ करोड १५ लाख रुपैयाँ मुनाफा आर्जन गर्न सफल भएको जनाएको छ । उक्त मुनाफ अघिल्लो आर्थिक वर्षको तुलनामा ६० दशमलव ६९ प्रतिशतले बढी हो । बैंकको प्रतिसेयर आम्दानी ३२ रुपैयाँ ७५ पैसा पुगेको छ । अघिल्लो वर्ष प्रतिशेयर आम्दानी २२ रुपैयाँ ९३ पैसा रहेको थियो । बैंकको खुद ब्याज आम्दानी ९९ करोड ८७ लाखमा ६२.६८ प्रतिशत ले वृद्धि भई गत पर्ष १ अर्ब ६२ करोड ३५ लाख पुगेको बैंकले जनाएको छ ।

बैंकले सञ्चालन खर्च र पँुजी लागतमा उल्लेख्य प्रगति हासिल गरेको छ । सञ्चालन मुनाफा अघिल्लो वर्षको तुलनामा ७४.४५ प्रतिशत बढेर १ अर्ब १७ करोड ५१ लाख पुगेको छ । त्यस्तै, बैंकको कोष लागत ५.४८ प्रतिशत बाट ४.४४ प्रतिशत मा झरेको छ भने खर्च अनुपात पनि ५०.१२ प्रतिशत बाट ४०.६५ प्रतिशत मा झरेको छ । ब्याज अन्तर २.१७ प्रतिशत मा सुधार भई वर्षको अन्तमा ३.१० प्रतिशत पुगेको बैंकले जनाएको छ ।

स्ाम्पत्तिमा प्रतिफलको अनुपात सुधार भई १.८१ प्रतिशत पुगेको भने बैंकको कर्जा निक्षेप अनुपात ७३.३० प्रतिशत बाट बृद्धि भई २०६९/७० को अन्तमा ७५.१८ प्रतिशत पुगेको छ । बैंकको पू्ँजी पर्याप्तता अनुपात नियमन निकायले तोकेको न्यूनतम १० प्रतिशत को तुलनामा १२.३९ प्रतिशत रहेको बैंकले जनाएको छ ।

बैंकले आफ्नो सम्पत्तिको गुणस्तरमा उल्लेख्य सुधार गर्दै खूद निष्कृय कर्जा ०.०१ प्रतिशत कायम गर्न सफल भएको छ । बैंकले आर्थिक वर्ष २०६९/७० को अन्त सम्ममा ५८ अर्ब ९२ करोड कुल निक्षेप संकलन गरी २९ अर्ब १९ करोड ३९ लाख कर्जा प्रवाह गरेको जनाएको छ ।